Guddoomiyaha Gobolka Banaadir ahna Duqa Magaalada Muqdisho, Mudane Yuusuf Xuseen Jimcaale (Madaale) ayaa Degmada Cabdicasiis ee Magaalada Muqdisho ka dhagax-dhigay waddo laami ah oo loogu magac-daray Allaha u naxriisto Madaxweynihii hore ee Soomaaliya, Cali Mahdi Maxamed.
Waddadaan oo isku xorta laamiga weyn ee Gaadiidka iyo laamiga Liido ayaa waxa ay dhex-marta Suuqyaraha Degmada Cabdicasiis, iyada oo munaasabadda dhagax-dhigga ay goobjoog ka ahaayeen Guddoomiyaha Degmada Cabdicasiis Marwo Ubax Rooda, qaar ka mid ah agaasimeyaasha guud iyo agaasime waaxeedyada Gobolka Banaadir, odayaasha deegaanka iyo Bulshada qaybahooda kala duwan.
Guddoomiyaha Degmada Cabdicasiis Marwo Roda Cabdi Cali (Ubax Roda) ayaa sheegtay in dhismaha waddadaan ay baahi weyn u qabeen bulshada Soomaaliyeed, maadaama Degmada Cabdicasiis ay tahay degmo dalxiis oo ay isugu yimaadaan dhammaan bulshada qaybahooda kala gedisan, waxa ayna waddadaan halbowlo u tahay isku socodka bulshada iyo isku-xirka xeebta Liido iyo Magaalada inteeda kale.
Ugu dambeyn, Guddoomiyaha Gobolka Banaadir ahna Duqa Muqdisho Mudane Yuusuf Xuseen Jimcaale (Madaale) ayaa ku amaanay bulshada iyo Maamulka degmada Cabdicasiis sida ay isaga kaashanayaan dhismaha waddadaan, isaga oo dhinaca kale ugu digay shirkadda gacanta ku haysa dhismaha waddadaan in lagula xisaabtami doonno tayada jidkaan, si loo helo laami tayadiisu ay sarreyso.
