Maamulka Degmada Xamarweyne, Waaxda Nadaafadda iyo Bilic soo celinta Maamulka Gobolka Banaadir iyo Waaxda Gaadiidka Dowladda Hoose ee Xamar ayaa olole nadaafadeed oo wadajir ah ka sameeyay xaafadda Aw-aweyska ee Degmada Xamarweyne.
Agaasimaha Guud ee Waaxda Nadaafada iyo Bilic soo celinta Maamulka Gobolka Banaadir, Mudane Maxamed Suudi ayaa sheegay in waaxda nadaafadda ay ka go’an tahay sidii ay u soo celin lahayd bilicda Caasimadda, laakiinse waxa uu tilmaamay in ay muhiim tahay iskaashi dhex-mara Waaxda Nadaafadda, Maamulada Degmooyinka iyo Bulshada qaybahooda kala gaddisan si loo gaaro magaalo nadiif ah la jaan-qaada dhigeeda caasimadaha aduunka.
Ugu dambeyn, Guddoomiyaha Degmada Xamarweyne, Daahir Maxamed Raajis ayaa digniin u diray shacabka qashinka ku shuba xaafadda Aw-aweyska, isaga oo xusay in qofkii lagu qabto isaga oo ka shaqeynaya nadaafad-darro sharciga lala tiigsan doonno.
