Agaasimaha Guud ee agaasinka qorshaynta, maalgashiga iyo horumarinta dhaqaalaha Maamulka Gobolka Banaadir, Mudane Cabulqaadir Muxyaddiin Axmed (Dalxa) iyo gudddoomiyaha ururka dhalinyarada Gobolka, Mudane Abdikaafi Maxamuud Makaraan ayaa Maanta ka qayb-galay shirka sare ee hoggaaminta barnaamijka horumarinta dhaqaalaha isku dhafan oo uu maalgaliyo Midowga Yurub.
Kulankan ayaa ahaa midkii 4-aad oo dhaca sanadkiiba mar, waxaana ku wada kulmo Wasaaradaha Qorshaynta heer fedaraal iyo heer dowlad-goboleed iyo maamulka gobolka Banaadir.
Sidoo kale, Waxaa kulankaan kasoo qayb-gala madaxda sare ee Midowga Yurub u qaabilsan Soomaaliya iyo hay’adaha fuliya barnaamijyada.
Barnaamijkan ayaa ka taageero Somalia qaybaha dib u dhiska kaabayaasha dhaqaalaha, kuwa bulshada, xirfadaha iyo shaqo abuurka dhallinyarada, taageerada bulshada taagta daran iyo bixinta maal-galinada yar-yar ee ganacsiga.
Ugu dambeyn, Kulanka inta uu socday maamulka gobolka Banaadir ayaa soo bandhigay dib u eegista lagu sameeyay qorshaha isku dhafan ee horumarinta dhaqaalaha ee uu maamulka leeyahay kaas oo tixraac u ah dhammaan hawlaha ay fulinayaan hay’adaha ka shaqeeya barnaamijka.
